Posición da Plataforma

Dende a Plataforma Monte Neme non entendemos como pode ser cualificado como de interese xeral un proxecto tan negativo para a zona.

As afeccións son moi negativas para a xente e a zona cando os beneficios son prácticamente na súa totalidade para unha empresa privada.

As afeccións ao patrimonio natural e cultural e á xente, imposibilitarán un futuro aproveitamento sustentable do monte e unha verdadeira economía verde e transición ecolóxica xusta.

Non queremos un Monte Neme como polígono industrial, senón como un espazo natural e patrimonial simbólico, no que as comunidades de veciños poidan aproveitar os seus recursos de forma sustentable.

O Nemio ten unha ubicación litoral, preto do espazo natural Razo-Baldaio, do que o Monte Neme debería ser parte nun conxunto máis amplo como zona natural continua do litoral carballés-malpicán. Ademáis, Monte Neme é coñecido como a balconada de Bergantiños, debido ao seu carácter de miradoiro excepcional, dende onde, se di, un pode ver todo Bergantiños (e moito máis aló) e dende todo punto de Bergantiños se pode ver o Monte Neme. Polo tanto, a afección á paisaxe e ao contorno natural que supón o parque eólico proxectado é inasumible.

O Monte Neme conta con varios xacementos arqueolóxicos; alomenos un castro por cada unha das cinco parroquias que abrangue, un xacemento romano non intervido e a reconstrucción dun dos poucos vestixios de crómlech de Galicia, a Eira das Meigas.

O parque eólico ademáis plantéxase en parte nos terreos das antigas minas de Volframio e Estaño, non restauradas, co perigo que pode supoñer a remoción das terras contaminadas e a posible afección ás aguas ladeiras abaixo (regos de Bandeira e da Gándara), da que se abastecen numerosos veciños.

Para a xente, ademáis de molestias como o ruído, suporá unha perda de valor dos terreos (estímase un 30%) e aínda máis, a perda mesma do territorio, que se verá parcialmente imposibilitado para a realización doutros usos e aproveitamentos como o gandeiro e forestal, incluso dado o caso nun futuro, o propio aproveitamento eólico local a pequena escala por comunidades de montes ou enerxéticas.

É por iso que facemos un chamamento a toda a sociedade galega que comprenda a importancia deste monte galego símbolico e o dano irreversible que este proxecto pode supoñer, a posicionarse en contra e alegar con nós para evitar que dito proxecto chegue a levarse adiante, poñendo unha liña vermella máis a este tipo de actuacións en Galicia.

Tamén pedimos un cambio de modelo eólico a nivel xeral en Galiza e España. No 2020 participamos no movemento #AldeasConHorizonte e asinamos o Manifesto "Aldeas con horizonte" (impulsado pola Rede Galega por un Rural Vivo conxuntamente cun cento de entidades galegas de diversa índole) que pide unha moratoria de parques eólicos mentres non haxa un novo modelo de desenvolvemento eólico sostible.